القدوة لا تتحقق بالقول فقط

ابني جاتله هدية من شخص ما فبقوله هااا بعد ما أخدت الهدية بتقول ايه ؟؟ فرد و قال بتلقائية: "مش عجباني أصلاً !!" فأخدته ع جنب و اتكلمنا في النقطة دي و تقريباً لأول مرة .. حاولت بأبسط الكلمات و باختصار أوضح إنه مهم يفصل بين مجهود الشخص و النتيجة النهائية، الشخص اللي جاب الهدية دي اقتطع جزء من فلوسه وخد من وقته و نزل بحث علي حاجة ليك. اهتم و فكر فيك عشان هدفه يدخل السرور على قلبك. هل شايف إن كل ده لا يستحق الشكر حتى لو النتيجة النهائية الهدية معجبتكش ؟! و فعلاً استوعب وقتها لكن أكيد هيحتاج تأكيد تاني.. 👈و لكن في نفس اللحظة حبيت أكلم نفسي أنا كمان في نفس النقطة أراجع نفسي و تصرفاتي معاه، هل بطبق معاه نفس المبدأ ؟؟ مثلاً طلبت منه يلتزم بتنظيف حجرته زي ما متفقين لكن نضافته مكنتش ع المستوي المطلوب أو مكنتش زي ما توقعت ؟؟ بتصرف وقتها إزاااااي !! هل بشكره علي جهده حتى لو النتيجة النهائية معجبتنيش !! و لا بلوم فيه و أعدل عليه و أقول أنا كمان بكل تلقائية تنضيفك معجبنيش !! و غيرها مواقف كتير. وقتها قولت لنفسي عشان فعلاً النقطة دي تتأكد عنده، لازم يشوفها فينا و يحسها في تعاملنا معاه، مش بس كلام و توجيه !! مواقف كتير يمكن تبان صغيرة و ممكن تعدي، لكن مع تكرارها بيكون ليها أثر كبير، مهم نقف عندها و نقومها صح.. 🌸انتِ قدوة. 🌸خلي أفعالك تعبر عن كلامك. 🌸العيال بتعمل اللي بتشوفه، مش اللي بتسمعه.

القدوة لا تتحقق بالقول فقط

هل أنت مُعلم أو مدرب؟