"بمناسبه المدارس والlunch box عايزه أقولك متستسهليش وتمليها ١- بسكوت وكيك جاهز مليان زيت نخيل ومواد حافظه وسكريات، مفيش حاجة اسمها شركة نضيفة أو مستورد الحاجات دي أساسية في أي صناعة، ابقي اقري اللي على الغلاف. ٢- سندودتشات جبن مطبوخة وسايلة وكوبايات أسوء أنواع الجِبَن الجِبَن المطبوخة. ٣- هوت دوج ولانشون وبانيه وبطاطس ومقليات. ٤- عصير معلب حتى لو اتكتب عليه طبيعي. حطي سلطه وفواكه فريش. حطي كيك وبسكوت معمول بدقيق شوفان ومتحلي بعسل أبيض ومعجون بزيت جوز هند زبادي مكسرات وفواكه مجففة بان كيك مليان دقيق شوفان وزيت بذر كتان وزبدة شيا وصوص الشوكلاتة اللي عليه (عسل وزيت جوز هند وكاكاو خام معلقة من كل حاجة وقلبيها) عصير ليمون متحلي بعسل أبيض وساقع 😍 صدور فراخ روستو مش مقلية ناجتس معمولة في البيت ومعمولة في الفرن بطاطا مشوية خضار سوتيه اومليت بالخضار بنجر مسلوق ومتقطع شرايح افوكادو مضروب مع عسل وكاكاو خام زي البودنج حمص شام طبعاً كان نفسي أقول وصفات بس أنا ده مش هدفي، هدفي نفكر مع بعض بين الفرق بين المخ اللي بيتغذي تفاح وموز وتمر ورمان وحمص ومكسرات وعسل وزيت جوز هند وشوفان. والمخ اللي بيتغذى زيوت مهدرجة وقمح وجلوتين ومواد حافظة. ببساطة ده مخ مركز وانفعالاته مظبوطة ومتزنة وطاقته هايلة فبيقدر يساعد صاحبه علي التحصيل والأداء. ركزوا انتوا بتدخلوا ايه جسم ولادكم، في ولاد السموم دي جزء من يومهم بقالهم سنين، محدش عارف يمكن السنة دي نبتدي نركز معاهم وتيجي السنة الجاية عليهم يبقوا عايشيين بنظام مختلف. حطي لنفسك خطه سنة، تجربي ويعجبهم حاجات ويرفضوا حاجات كتير من الأمهات اللي ولادهم بياكلوا صحي طلع عينهم على فكرة في تجربة وصفات هبل ومقاومة و زنّ بس مع الوقت الدنيا ظبطت. حتى لو هتمشي كده نص الأسبوع اهو احسن ما يبقي كل يوم 😊 اعملي اللي عليكي ومتفكريش كتير في النتايج لأن النتايج دي رزق بس السعي فرض 😊 عام دراسي كله صحه وتوفيق ودُمتي مؤثره 😊
غذاء طفلك في المدرسة
