الطفل عالي الحساسية

"تلاقي كل الأطفال بتشارك و تتواصل مع بعضها إلا طفل بيتفرج في صمت ,الطفل عالي الحساسية ❤ الطفل ده بيحس و يتأثر أعمق من غيره ممكن كلمة أو نظرة محدش ياخد باله منها بس توجعه 💔 يعني الطفل ده هيتساب هيعيش كده أعصابه تعبانة طول الوقت؟ لأ من رحمة ربنا إنه خلق فيه مع عمق المشاعر عمق في التفكير و التحليل و التأمل و دول اللي بيساعدوه يتصرف بحذر و حكمة أكتر فيبقى أقل عرضة لحدوث شئ يوجعه. الطفل ده دماغه وأفكاره عمقها مذهل، في عز ما الطفل اللي جمبه ببساطة شديدة عايز يشارك فرفع إيده و قال اللي جه في دماغه، هو بيراقب الأجواء الأول بيفكر هو الولاد دول لما يجاوبوا غلط الميس هتعمل إيه؟ طب لو ولد جاوب غلط باقي زمايله بيعملوا إيه؟ لو رفعت إيدي و طلع كلامي غلط الولد اللي جمبي ده هيعمل إيه؟ تفكير تفكير و افتراض لكل سيناريو ونتايجه المحتملة واستخدام الذاكرة من مراقبته السابقة وخبراته و ...... لحد ما يحس إن البيئة آمنه فيبدأ يظهر ❤هو بيتعامل مع معظم مواقف حياته كده. في وسط التفكير المطول ده لما مامته تقوله ما تروح تشارك يابني و تزقه عالحاجة هي بالنسباله متهورة من عالم آخر و مش بعيد مخه يقلق من اندفاعها ويرجعه يحلل من الأول. 😂 مرات كتير مبيشاركش، مرات مبيتصاحبش على حد معين، و كتير ممكن لو حد قال كلمة وجعته يسكت علشان هو في كل المواقف دي عقله قاله إن النتيجة ممكن توجعك أكتر من الوضع اللي انت فيه دلوقتي، و كتير جدااااا بيبقى قرارهم ده هو أحسن حاجة ليهم فعلا. -------------------------------------------------------------------- نساعدهم إزاي ؟ 1- مش هيتغير: دي طبيعته و اقبليها، آه تعاملك الصح هيوازنها، هيشجعه أكتر لكن هتفضل طبيعته ظاهرة، لو عايزة تحوليه لطفل مندفع و مشاعره جامدة هيطلع في الآخر طفل ملوش ملامح. 2- سيبيه: إديه مساحة يراقب ويتطمن وياخد وقته من غير ما يحس إنك منتظرة يخلص وينجز. 3-ظبطى التوقعات: إسألي نفسك هل توقعاتي منطقية لشخصية طفلي؟ يعني هو نزل وراح النشاط وقابل ناس جديدة ودخل وقاعد يسمع ده بالنسباله كتير، مش لازم بقى يتكلم ويتصاحب عالعيال و يوزع الكارت بتاعه عالحضور. 😂 4- لاحظي الحلو: التقدير و التشجيــــــع زي الأوكسجين للطفل ده بجد، يعني جرب النشاط في صمت: شجعيه إنه قدر يدخل تجربة جديدة و يحضر رغم إنه ميعرفش حد. بيحكيلك إن حد ضايقه وهو مردش: شجعيه إنه بيحكيلك عن اللي ضايقه و اشكريه على ثقته فيكي .... دوري عالحلو و وريله فين مواطن قوته. 5- اختاري معاركك: انت و الطفل عندكوا طاقة محدودة مينفعش يبقى كل كبيرة و صغيرة بتعلقيله عليها و تزقيه عليها خصوصاً لو بأسلوب ناقد ده مُرهِق ليه جداً. اختاري حاجة واحدة بس اديها أهمية. 6- خطوة محددة صغيرة: ساعديه يعمل خطوة صغيرة جداً في اتجاه الموضوع ده، مفيش خطوة اسمها قوم اتصاحب عالأطفال و شارك دي خطوة نعامة مش طفل حساس. 😂 مثلاً عايزاه يشارك: ممكن أول خطوة إنه لما يروح يحكيلك لو كان شارك كان نفسه يقول إيه، بس كده لحد ما واحدة واحدة يتشجع إنه الميس تبقى مكانك. يتصاحب عالأطفال: يختار طفل يقوله إزيك الصبح أو يختار طفل يقوله كلمة وقت البريك و هكذا. - متطلبوش ليهم خدمات خاصة من المجتمع جو معلش يا ميس أصل ابني حساس فلما قولتي لصاحبه ركز هو قلق يشارك ده مينفعش. ما دام مفيش أذى حقيقي حصل سيبوا الحياة تمشي بحلوها و مرها ده اللي هيقويهم. - ملاحظة على جمب عايزة أقولكوا إن أصلاً المشاركة ملهاش أي علاقة بالاستفادة هو بيبقى بيراقب و يحلل كلام الكل ويستفاد بيه يمكن أحياناً أعمق من اللي شارك، شوفوا الدنيا بعيونهم وسيبوهم يعيشوها بطريقتهم وشجعوهم وعلموهم بطريقة على مقاسهم هينوروا لدرجة مبهرة. ❤ أنا واحدة من الأطفال دول فتلاقوني محموقة شوية. 😂

الطفل عالي الحساسية

هل أنت مُعلم أو مدرب؟