"سيبي الطفل يعيط"، "متشيلهوش"، "متعودهوش على الشيل و هو هيتعود يسكت لوحده". هقولكم على (طفل احتضان) أسرته لسه مستلمينه. الولد متنّح مبرّق طول الوقت مبيعيطش خالص، قاعد ساكت طول الوقت، مبيطلبش حد يشيله، مامته بتقولّي حتى لما بيجوع باليل مبيعيطش يصحيني بيصحي يمص صوابعه و خلاص و أنا الي بضبط منبه عشان أصحى أرضعه. عارفين الطفل مَرّ بإيه عشان يوصل للمرحلة دي؟ متساب مبيعملش حاجة غير إنه متساب طول الوقت. محدش بيلبي رغباته العاطفية و لا يجري عليه يحضنه لما يعيط أو يخاف، بالكاد تُلَبي احتياجاته الفسيولوجية لحد ما نسي يعني ايه عاطفة و اتعلق بحد و اطمن في حضنه من كتر الأيادي الي بيتنقلها و من كتر ما طلب تواصل عاطفي و ملاقاش الحمد لله ربنا عوضه ب أم و أب أحن عليه من أمه و أبوه اللي سابوه و رزقه بأسرة و حضن و دفا. بالمناسبة أي طفل أصلاً طول شهور الحمل متشال.. ف هو متعود على الشيل أصلاً و احنا محتاجين نمهد له إن احنا محتاجين ننزلك شوية و نفصلك تدريجي، مش نقطع أي تواصل و نسيبك تتفلق لحد ما تفقد ثقتك فينا و نرمي لك تيتينا تسكتك و مسمعش صوتك غير و انت جعان او بتغير بس. أول ٣ شهور بعد الولادة دول 4 trimester تلت الحمل الرابع لأنه لسه فاهم إنه جنين مش فاهم إنه اتولد ف طبيعي ميتقبلش الانفصال كدة"
حمل حديثي الولادة بين الصواب والخطأ
