اقْبَلني يا معَّلِّمي دون شروط

نفسي أوصَّل لكل مدرس/ مدرسة وكل شخص بيتعامل مع أطفال إن من أهم أدوارهم " قبول الأطفال كلها " وإن دا يوصل للطفل .. مهم جدًا جدًا جدًا إن الطفل يحس إنه مقبول والمدرس بيحبه بعيدًا عن مستواه الدراسي .. المدرس بيحس بضغط رهيب من مستوى الطفل الدراسي .. لكن الطفل بس بيستنى " القبول " للأسف كمان المدرسين أحيانًا بيركزوا مع الطفل الأجمل شكلاً .. ساعات اللمض واللطيف والشاطر.. نفسي نخصص هدايا بسيطة جدًا بس للطفل اللي مش ظاهر .. ( ممكن sticky note ملونة عليها كلمة حلوة - ستيكر - نجمة بتضحك بالقلم - قلم كله جميل ) حاجات بسيطة جدًا وهتخلي الطفل يطير من السعادة .. مهم كل طفل يحس إنه مقبول من غير ما يحقق أي انجاز دراسي .. في مبدأ جميل بيقول : "Catch them being good 😊 “ دور على أي حاجة حلوة واشكره عليها .. ( منظم - نظيف - ساعد حد من أصحابه ف حاجة - ااااااي حاجة ) في أطفال هتفضل طول عمرها مستواها متوسط أو ضعيف .. في أطفال عندها مشاكل حقيقية بتأثر على تركيزهم .. مشاكل كتير جدًا أكبر من قدرة المدرس/ ة في كوارث في البيوت الأطفال بتتعرض ليها .. مش مطلوب منك خااالص تصلحها .. كل المطلوب الطفل " اللي مش متشاف " يروّح بيته مبسوط .. ويحس إنه مقبول ومحبوب .. بكلمة أو نطرة أو حاجة تحفيزية بسيطة .. حتى الأطفال اللي علطول بتتشاقى وتعمل مشاكل.. مهم يخرج من خانة الرفض والزعيق دايمًا .. كل الأطفال هتكبر وتشتغل في مجالات الحياة المختلفة .. اللي هيفضل باقي وموجود في تكوينه وذاكرته قبول مدرسينه ليه .. وهتكبر معاه ثقته في نفسه وشعوره بإنه جميل ومقبول .. التعامل مع الأطفال محتاج صبر ورحمة وحكمة .. والأثر والفارق كبير جدًا جدًا .. ودا اللي بيبقى .. 😊 للأسف دي مشكلة المجتمع عموما .. يعني أحيانًا حتى بيحصل على مستوى الأهل والقرايب مع الأطفال ..

اقْبَلني يا معَّلِّمي دون شروط

هل أنت مُعلم أو مدرب؟