حماية الأطفال من التحرش

أولياء أمور كتير أرسلوا ليا عن موضوع الأطفال اللي تم الاعتداء عليهم والتحرش بيهم في مدرسة معينة وللأسف دي مش أول مرة يحصل كدا في مدارس كتير وحضانات واستغلال واضح للأطفال في سن الروضة بالتهديد مرة والترغيب مرة والناس عايزة تعرف تحمي أولادها ازاي خصوصاً بعد ما المدرسة نفسها عتمت ع الخبر وطلبوا من الأم التكتم عن الحادثة. 1- في البداية ياريت أفهم كويس إن توعية الطفل مش قلة أدب ولا أنا بفتح عينه ولا هو عيب متتكلمش الكلام العيب دا فالطفل وقتها لو حصله حاجة لا قدّر الله بيسكت لأنه فاهم إنه عيب. 2- لازم أقرَّب من ابني وأتابع معاه تفاصيل يومه في المدرسة لو رجع معيط أو منطوي وعايز ينام وخايف أي حد يقرّب منه، لازم أسأله أول حاجة تتسأل: في حد ضايقك؟ في حد عملك حاجة؟ 3- لو ابني بدء يجيله اضطرابات نوم ويصرخ بدون سبب وهو نايم فقد شهيته للأكل وبدأ يعيط لو سألتيه عن شخص معين أو يقولك مش بحبه مش عايز أشوفه مش عايز أروح الحضانة أو المدرسة لازم أقلق. 4- لو الطفل بدأ يحصل له تبول لا إرداي أو التهابات في الأماكن الحساسة او لاحظتي ورم او أثر لخرابيش او بدأ يلمس الأماكن الحساسة بشكل مفرط ويردد كلمات سيئة. 5- لو ابنك لمّح لمواضيع إن فيه سرّ بينه وبين شخص معين وبدأ يجيب له ألعاب وحلويات كتير جداً ويقولك عمو أو طنط قالت لي مقولش لماما عن السر الكبير اللي بينا. كل دي خطوط حمراء .. جرس إنذار لازم أقـــــــلــق -------- في نصائح لازم نعملها عشان نعلم أولادنا إزاي يحموا نفسهم : 1- أمنع ابني من خلع ملابسه أدام أي حد عشان يتعلم الخصوصية ولا حد يطلب منه يخلع ملابسه. 2- أقفل باب الحمام ومسمحش لحد يدخل معاايا الحمام ولو في حد كبير أستني يخرج وأدخل بعده ولو أصر يكون معايا أرجع أبلغ الميس بتاعتي. 3- عدم الاستحمام مع أي شخص عشان يفهم إن في حدود ومسافة بينه وبين أي شخص لازم أحافظ عليها وأحترمها. 4- عدم النوم فى فراش واحد مع أحد مهما كان .. مهما كااااااااااان. 5- عدم الجلوس على رجل أحد أو الوقوف بين قدميه وعدم التقبيل من الفم أبداااا ولا حتى علي سبيل التدليل. 6- توعية الطفل على أن يفرِّق بين اللمسة الكويسة واللمسة السيئة لأماكن معينة في الجسم. 7- عدم زغزغة الطفل وتدليكه فى أماكن العورة خاصةً عند وضع زيت الأطفال أو البيبى لوشن عند الغيار حتي لا يُعَمَّمْ ذلك في ذهنه وعندما يفعل غريب ذلك التصرف يراه أنه عادي ويستمتع به. 8- عدم منح الثقة المطلقة للمحارم وأطفال العائلة والأصدقاء والمُعلّمين والمُشرفين في الباصات والمدربين في النادي. 9- عدم تناول شيء من الغرباء أبداً علي سبيل الحلويات أو الأدوية أو العصائر. 10- عدم فتح الباب لأي أحد طول ما الطفل في البيت بمفرده . 11- لا تُجْبِرى الطفل على تقبيل أحد أو حضنه واحترمى رغبته فى ذلك. 12- عدم الاستسلام إذا تعرّض لتحرش لا قدّر الله أو إذا حاول أحدهم الاعتداء عليهم يجب أن يصرخ ويدافع عن نفسه ويضرب ويجري ويستعين بأقرب شخص ويبلغه حتى يصل إليكِ ويعرفك ماذا حدث له. 13- يسمع كلام الكبار في حدود تخصصهم مثلاً. المدرس فى عمل الواجب وبالنسبة للسواق الباص يستمع لكلامه فى أساليب الحماية والركوب والنزول. بخلاف ذلك لاأ. 14- أجيب عروسة أو صورة ولد أو بنت حسب نوع طفلك وأشرح له عليه الأماكن الخاصة اللي مينفعش حد يلمسني فيها. 15- علِّمِي طفلك أن لا يقبل صداقة أحد في لعبةٍ ما (إلكترونية) أو طلب صداقة مواقع التواصل الاجتماعي وإذا راسله أحد وبعث إليه برسالة خليعة يغلق النت ويخبركم بما حدث. 16- عودي طفلك على كلمة سر بينكم فقط. لأن هناك أطفال يختلط عليهم الأمر فى الأماكن العامة ويذهب الى أخرى ترتدي نفس الملابس وأنه لا يذهب مع أي شخص يدَّعي أنكِ أو أباه أرسلتيه ليأخذه. إذا أتي طفلك يشكو إليك لا قدر الله اعتداء وقع عليه يجب أن تحتوي الموقف وتطمئنيه ويراك بالفعل تتجاوبي معه وتصرِّي على عقاب المجرم حتى يكون عبرة ولا يكرر فَعْلَتِه مع أحد غير ابنك .. لا تتعاملي مع الطفل أنه المذنب لأن ابنك هو ضحية شخص عديم الضمير مضطرب نفسياً وضحيتك أيضاً لعدم توعيته وإرشاده بما عليه أن يفعل ليحمي نفسه ربنا يحمي كل أولادنا ويبعد عنهم كل شر وأذى.

حماية الأطفال من التحرش

هل أنت مُعلم أو مدرب؟