الملاذ الآمن

خلينا نحاول نكون دايرة ❤️أمان❤️ لولادنا.. - اه بندخل معاهم في خلافات..اه بيحصل بينا كتير مشادات.. زي أي علاقة أم بولادها لكن دايماً نحاول نبني معاهم بالتوازي دايرة أمان. دايرة أمان تخليهم مع أي مشكلة كبيرة أو هم او موقف صعب نكون احنا رقم واحد اللي يلجأوا له. مش يجروا على أصحابهم، أو أمهات أصحابهم ليه منكنش احنا أولي عندهم !! الدايرة دي مش هتتبني في يوم وليلة،، و مش هتتبني يمكن بسهولة لكنها مش مستحيلة إن شاء الله. ▪️ استعيني بالله، و ادعيه إنه يلهمك دايماً الصواب و الخير في مواقفك المختلفة مع ولادك. ▪️ رددي عليهم دايما "انا أمانك". دايماً كنت بعملها مع بنتي الكبيرة و حقيقي كانت هي قبل أي موقف كبير عايزة تحكيه ليا، تبدأ و تقولي: "مش حضرتك بتقولي إنك أمان ليا". فاعرف على طول إن في حاجة كبيرة هتحكيها. ▪️خليهم دايرة أمان هما كمان ليكي،، تترمي في حضنهم و تتكلمي معاهم في أمورك،، فيبقى الشعور و المكانة دي متبادلة. ▪️دايما افتحي معاهم حوار و نقاش عام، خليهم يطلعوا أفكارهم قصادك بأمان و راجعيهم فيها بهدوء و لطف. ▪️اتعرفي و قربي من أصحابهم، و خليكي لطيفة معاهم،، و لو مش عجبك حد فيهم متقوليش عليه شخصياً كلام وحش يضايق ولادك، لكن اتكلمي بتدرج و بشكل غير مباشر. ▪️ شاركيهم من وقت للتاني حاجات بيحبوها، حتى لو تقيلة عليكي أو بتستسخفيها. ▪️اتكلمي عنهم حلو قصاد الناس، افتخري بيهم. ▪️عززي سلوكياتهم أول بأول، متبقيش بس شايفة و معلقة علي الوحش. ▪️حدّي من غضبك الدنيوي شوية، الغضب بيديهم رسالة عكس الأمان تماماً. ❤️كوني أمان ولادك.